1/2 [الغلا] ... للشاعر أحمد الصانع!

إحدى روائع الشاعر،

أحمد الصانع،

،



تعبت أشيل الهم عنك وأداريك
وإنت همومي ثقلها .. ما يهمك!

لا يا حبيبي، هالزمن لا يخليك
تقسى على قلبي وتسقيه سمّك!

[دنياك] هذي، لاتغيِّر مباديك
مهما إستطعت الظلم خلني أضمك!

ماهي غريبه من يذمِّك يماشيك
لكن غريبه يمدحك من يذمك!!

ما كل واحد غاب معناه ناسيك
بعض البشر ينساك لو كان يمّك!

أدري تعزني .. الله يعز: غاليك
وإن كان لي عندك معزَّه ب أشمّك!

في خاطري كم كلمةٍ عن تجافيك
ولا شفت دمعاتي إنزلت حط كمّك!

إسمك حبيبي ويا كثرها أساميك
وقلبي يفز، إن شاف حزنك وغمّك!

ليتك تحس في ضيقتي يوم أحاتيك
أحرق لك أعصابي .. وما حس دمّك!

غايب بدون أعذار .. ربِّي يجازيك
عطني سبب مُقنع حبيبي .. وألمّك!

همِّك، جنونك، ضحكتك، كل ما فيك
صوتك، سكوتك، وأرجع أقول: ( ه مّ ك)!

[لبيه] منِّك، غييير .. لمَّا أناديك
كن | الكلام العذب | ... مرساه فمّك!

أبوك، خالك، إختك، أخوك، ماضيك
ربعك، جميع الناس، وعيال عمك!

شايف غلاهم؟ والله أكثر، أنا أغليك
واللي وِصَل (نِص الغلا) يمكن أمك!